Namatyan ni Donya Narcisa Aranas
Didto niadtong unahan
Tuay akong hinglantawan,
Iya akong gitutokan
Kang Ferning gayud larawan.
Ning kusog akong dalagan
Buot ko siyang apason,
Kamingaw nga dili tup-ngan
Kaniya makigsugilon.
Ning abut sa gitindugan
Ferning wala, na igkita,
Sa hangak nga hinlabihan
Ning higda na lang sa yuta.
Nahikatulog sa daklit
Ingon sa ginadamgo ko,
Tua na sa mga langit
Nagadayig sa Ginoo.
Nahapugwat pag-kadungog
Sa makusog nga haganas,
Nahalukso sa pagtindog
Ay! baboy diayng ihalas.
Sa ako nga paghimatngon
May gamayng papil gikumkom,
Gidali pagbasa dayon
Nga naga ingon:
“Ay! Mama pumauli na
Ayaw ako pag apasa,
Si Papa lang atimana
Kay atua siya nga usa.”
Ning pauli ako dayon
Timamana ang gidulong,
Kay ako nga nahinumdom
Sa Inahan kong gilubong.
Ning agi ako’s kalubngan
Sa mga bulak gidad-an
Mao ang adlawng namatyan
Sa hinigugma kong Inahan.
BRUNA
ARANAS DE BUYSER
Agong-ongan.
Abril 14, 1944