TAMPALASANG HAPON
Kapait hunahunaon ning among pagkabutang,
Nia kami magpuyo ilalum sa kalasangan,
Among pinuy-anan walay kawili gipamiyaan
Kay ang mga Hapon buot kanamo mamunoan.
Kanhi uyon nalang, nga sila na ang mamunoan
Apan may ilang batasan among gikasilagan,
Ang diutayng kasal-anan sa liog pagapunggotan,
Kanamo nakaaghat pagtago sa kagulangan.
Balay namong gitalikdan, ang lukob giablihan
Mga butang giukadyang mga kaban giukban,
Mga lamisa, lingkoranan gipamiangan,
Mga libro, retrato gipanggisi, gitamakan.
Wala pa sila matagbaw sa ilang pagpanggukod
Namalik sila aron sa kabalayan manunog,
Mga butang ug mga tanum nahurot kapagod
Lakip ang kang Dr. Rizal istatuwa gatindog.
Apan wa maunsa, kang Dr. Rizal istatuwa
Gibutang nila’s dalan gipapas-an sa timbangan.
Daku namo nga kapungot sa ilang binuhatan
Ang among gipakamahal, ilang gipasipad-an.
Kaniadto ilang gidumtan, ang tawong kawatan
Kong ila ngani hindakpan sa liog pagaputlan,
Apan unsa naman karon, sila na ang kiriwan
Manakas kabalayan manguha sa mga butang.
Anaay ilang batasan, labihan kasalawayon
Motukad sa kabukiran mangawat sa mga lagotmon,
Dili pa sila matagbaw mga tanum pangibton,
Ang tanang mga buhion ila nga pagadad-on.
Maayong atong buhaton, ang layi ni Talion,
Kita magpakahilum ilang pagadaugdaugon.
Lakat mga lalaking batan-on, inyong asdangon
Kong kita ngani magaurong, ila kitang gukdon.
Mga batan-on lakat na, ayaw kamo paglangan,
Aron mga sibilyan makapananum daghan,
Kay kon dili ngani ninyo sila bantayan
Ang dakung gutom ato gayud nga hiaguman.
Lakat ayaw kahadlok sa inyong pagaadtoan
Kay ania na gayud ang Amerikang panabang,
Mga ayroplano nilang nanglabay kadaghan
Lakip mga submarine gadalag bala ug “machine-gun.”
BRUNA
ARANAS DE BUYSER
Bukid sa Maniayaw, Agosto 19, 1944