Ibabaw Sa Lubong Ni Obispo Fernando Buyser
Kapait Ay! Sa akong gibati
Sa dayon imo mang gitalikdan;
Kasingkasing hapit na magisi,
Naa kana sa imong lubnganan.
Ang tingong mo, di kona mabati
Nga magasangpit sa akong ngalan;
Mga sinulat mo ipapili
Ipabutang imong sulatanan.
Kanhi sa daghan kag mga buhat,
Ako ikaw nga pagatabangan;
Aron hunahuna di mabug-at
Mga sulat mangabut pagdungan.
Mga basahon, akong masud-ong
Sa kaguol ko pagalugpitan,
Sa pagbalay mo, sa mga pulong
Nakadugang sa imong balatian.
Asa kona ikaw pangitaa
Nga makita ko, imong dagway,
Napuno sa luha mga mata
Kamingaw nga halos ikamatay.
Unsa ba kining mga kamingaw
Nga dili man mobulag kanako,
Giunsa kona lag lingawlingaw
Aron dili ako motikoko.
Moduaw ako’s imong gilubngan
Aron kamingaw ko mapala;
Magasakit akong dungan-dungan
Kay dili kona ikaw makita.
BRUNA
ARANAS DE BUYSER
Timamana, Maiit, Surigaw
Nov. 22, 1946.