Ang Pagkasakit Ni Obispo Fernando Buyser
May kan-uman na ug lima ka tuig
Ang ginalabang ko ning kalibutan,
Mga lutahan hapit na motuskig,
Tungod sa daghang mga balatian.
Pait kayo sa mga tigulang
Kon wala siyay katigayonan,
Ang mga buhat dili ay! matangtang
Kay wala man siya ing hinguhaan.
Mga salapian maoy bulahan
Bisan sila maga masakiton,
Ang paglihok nila magaangaan
Kay duna silay mga sulugoon.
Baya na man sa ingon kanako
Nga wala gayud ing kabuhi-an,
Ang pagbuhat kanunay nga giduko
Kay masakiton ang akong kauban.
Si Bathala akong gipangayoan
Nga ang masakiton ko nga kauban,
Iya intawon nga pagatangtangan
Daghan kaayong mga balatian.
Mga pagtukaw ko sa kagabhion
Aron pagatiman sa masakiton,
Ang kagutom akong pagaantuson
Ingon man ang katugnaw sa kaadlawon.
Nga tanan dili ko igasapayan
Daghan kaayong mga kalisdanan,
Hinaut unta ako nang mapasan
Nga ang masakiton hiulian lang.
Pagkabangis mo gayud balatian!
Nga ang tawong imong pagatakbuyan,
Halus dili mo na pagabulagan
Hangtud sa pagniwang sa higdaanan.
BRUNA
ARANAS DE BUYSER
Maniayaw (Tangki sa Kulorom)
Oct. 6, 1944.