ANG GIBATI SA INAHAN
Pagkadaku ay, sa kagul-anan!
Nga gihambin sa Saling inahan,
Kay sa iyang piso natagakan;
Nga hingpunitan sa kabata-an.
Gibitay sa among balisbisan
Ug nagasamot sa pag-agak-ak,
Pagkabati sa ilang inahan
Nagpaduol sa paglupadlupad.
Sa pagkahapon, akong hingkitan
Ning tugdon duol sa gibutangan,
Sa inahan dili gayud lung-an
Pagsakdopsakdop sa gisudlan.
Kasingkasing ‘guol sa Inahan
Sa iyang mga anak kawad-an,
Sa pagpangita dili hunongan
Hangtud nga iyang hingkaplagan.
Kabataan ayaw pasipad-i
Ang mga langgam sa kagulangan,
Wala ngani ninyo hibaloi
Mga Inahan hitiraduran.
Mobati unta kamog kaluoy
Ang piso kawad-an sa Inahan,
Sa pagkaon dili na kadad-an
Mangamatay na sila nga tanan.
Ang mga langgam atong mahalon
Ingon sa mabinationg igsoon,
Ug ato gani silang puohon
Kalibutan wala nay katahum.
Magyuyuta maoy ilang kalipay
Ang mga tingog sa kalanggaman,
Sa ilang kahago makahupay
Mga honi sa kinaiyahan.
Ang tingog dili kapul-an
Labihan gayud kaalingisi,
Mahinangop ang imong dalunggan
Mapasalamaton ang kasingkasing.
BRUNA
ARANAS DE BUYSER
Bukid sa Maniayaw.
Sept. 9, 1944