H A M P A K A !
SONANOY
--
Paglipay kay inyo pa karong adlaw
Ug panginum taman sa pagkahubog;
Hampaka kami sa tumang pagkaulaw
Kay sa kalisud di kami mosibog.
*
Ang Matuud nganong inyong giga-id
Ug ang tanlag inyo mang gibinaklid?
Pati dungog sa lapok gipaligid
Ug ang kaligdong sa gahong gipuklid.
*
Kawang ang inyong tuyog paningkamot
Pagpangitas dayon namong kapukan,
Kay mao ray makahimo nianag kab-ot
Ang tawong dunay hingpit kagawasan.
*
Kamo nga binugkos ang mga kamot
Sa kaulipnan ninyo ayaw kalimot.
BISAYA, Hunyo 24, 1940
No comments:
Post a Comment
Note: Only a member of this blog may post a comment.